ایران اور امریکہ کے درمیان ممکنہ سفارتی پیش رفت کے تناظر میں اہم سرگرمیاں سامنے آ رہی ہیں۔ امریکی نشریاتی ادارے سی این این کی رپورٹ کے مطابق ایرانی مذاکراتی وفد منگل کے روز پاکستان پہنچنے کا امکان ہے، جہاں بات چیت کے اگلے مرحلے کی تیاری جاری ہے۔
رپورٹ میں بتایا گیا ہے کہ تہران کی جانب سے بھیجا جانے والا وفد ممکنہ طور پر انہی اہم شخصیات پر مشتمل ہوگا جو پہلے دورِ مذاکرات میں شریک رہی تھیں، جس سے تسلسل برقرار رکھنے کی کوشش ظاہر ہوتی ہے۔
امریکی میڈیا کا دعویٰ ہے کہ ایران کو امید ہے کہ بدھ کے روز جنگ بندی میں توسیع کے حوالے سے ایک مشترکہ اور علامتی اعلان سامنے آ سکتا ہے، بشرطیکہ مذاکرات مثبت سمت میں آگے بڑھیں۔
مزید یہ کہ اگر حالات سازگار رہے اور امریکی صدر ڈونلڈ ٹرمپ پاکستان آنے پر آمادہ ہو گئے تو ایرانی صدر کا دورہ بھی متوقع ہو سکتا ہے۔ ایسی صورت میں دونوں ممالک کے سربراہان کی موجودگی میں مشترکہ اعلامیے پر دستخط کیے جانے کا امکان ظاہر کیا جا رہا ہے۔
تاہم اب تک ایران کی جانب سے اس ممکنہ دورے یا وفد کی روانگی کی باضابطہ تصدیق سامنے نہیں آئی۔
یاد رہے کہ ایک روز قبل امریکی صدر ڈونلڈ ٹرمپ نے بھی عندیہ دیا تھا کہ ان کے نمائندے مذاکرات کے لیے اسلام آباد روانہ ہو رہے ہیں، جس سے سفارتی سرگرمیوں میں تیزی کا اشارہ ملتا ہے۔
