راولپنڈی: پاک فوج کے شعبہ تعلقات عامہ (آئی ایس پی آر) کے مطابق 13 سے 15 اکتوبر 2025 کے دوران خیبرپختونخوا کے مختلف علاقوں میں سیکیورٹی فورسز کی کارروائیوں میں بھارتی حمایت یافتہ دہشتگرد تنظیم “خوارج” کے 34 دہشتگردوں کو ہلاک کر دیا گیا۔
آئی ایس پی آر کے بیان کے مطابق، شمالی وزیرستان کے علاقے سپین وام میں خوارج کی موجودگی کی اطلاع پر انٹیلی جنس بنیاد پر آپریشن کیا گیا، جس میں 18 دہشتگردوں کو جہنم واصل کیا گیا۔ کارروائی کے دوران سیکیورٹی فورسز اور دہشتگردوں کے درمیان شدید فائرنگ کا تبادلہ ہوا۔
اسی نوعیت کی ایک اور کارروائی جنوبی وزیرستان میں کی گئی، جہاں فائرنگ کے تبادلے میں مزید 8 دہشتگردوں کو مار دیا گیا۔
تیسری جھڑپ بنوں کے علاقے میں پیش آئی، جہاں سیکیورٹی فورسز نے مزید 8 دہشتگردوں کو ہلاک کر دیا۔
آئی ایس پی آر کے مطابق، علاقے میں سرچ اور سینیٹائزیشن آپریشن جاری ہے تاکہ بھارتی سرپرستی میں کام کرنے والے باقی دہشتگردوں کا بھی خاتمہ کیا جا سکے۔ یہ کارروائیاں “عزمِ استحکام” کے تحت کی جا رہی ہیں، جو نیشنل ایکشن پلان کے فریم ورک میں وفاقی ایپکس کمیٹی کی منظوری سے جاری ہے۔
آئی ایس پی آر نے یقین دہانی کرائی ہے کہ پاکستان کی سیکیورٹی فورسز اور قانون نافذ کرنے والے ادارے ملک سے بیرونی حمایت یافتہ دہشتگردی کے مکمل خاتمے تک آپریشنز جاری رکھیں گے۔
