امریکی وزیر خارجہ مارکو روبیو نے کہا ہے کہ دونوں ممالک کے درمیان حالیہ کشیدگی کے باوجود چینی صدر شی جن پنگ کے ستمبر میں متوقع دورۂ امریکا کی تیاریاں معمول کے مطابق جاری ہیں۔
شی جن پنگ ستمبر میں امریکا آئیں گے، روبیو
آسیان وزرائے خارجہ اجلاس میں شرکت کے لیے روانگی سے قبل صحافیوں سے گفتگو کرتے ہوئے مارکو روبیو نے کہا کہ انہیں ایسا کوئی اشارہ نہیں ملا کہ چینی صدر کا دورہ مؤخر یا منسوخ ہو رہا ہے، بلکہ اس کی تیاریاں مسلسل جاری ہیں۔
چینی ٹیمیں دورے کی تیاریوں میں مصروف
روبیو کے مطابق چینی حکام دورے کی منصوبہ بندی کے لیے مختلف وفود امریکا بھیج رہے ہیں، جس سے ظاہر ہوتا ہے کہ دونوں ممالک رابطے برقرار رکھے ہوئے ہیں۔
ٹرمپ کے الزامات کے باوجود سفارتی رابطے جاری
یاد رہے کہ گزشتہ ہفتے امریکی صدر ڈونلڈ ٹرمپ نے چین پر 2020 کے امریکی صدارتی انتخابات میں مداخلت کا الزام عائد کیا تھا، تاہم بیجنگ نے ان دعوؤں کو مسترد کر دیا۔
اختلافات کے باوجود رابطہ ضروری، روبیو
امریکی وزیر خارجہ نے کہا کہ امریکا اور چین جیسی بڑی طاقتوں کے درمیان اختلافات فطری ہیں، لیکن عالمی استحکام اور دونوں ممالک کے مفاد میں سفارتی رابطے برقرار رکھنا ناگزیر ہے۔
آسیان اجلاس میں اہم ملاقاتوں کا امکان
مارکو روبیو نے بتایا کہ منیلا میں ہونے والے آسیان اجلاس کے دوران مختلف رہنماؤں سے مشاورت متوقع ہے۔ میڈیا رپورٹس کے مطابق چینی وزیر خارجہ وانگ یی اور روسی وزیر خارجہ سرگئی لاوروف بھی اجلاس میں شریک ہوں گے، تاہم روبیو نے کسی دوطرفہ ملاقات کی باضابطہ تصدیق نہیں کی۔
