الاسکا: امریکی فوج کے مطابق الاسکا میں امریکی فضائیہ کے ایک دور افتادہ مقام پر طیارہ حادثے کا شکار ہوگیا، جس کے نتیجے میں 8 افراد ہلاک ہوگئے۔
الاسکا کمانڈ کے مطابق سول کنٹریکٹر کے زیر استعمال طیارہ ریاست کے جنوب مغربی حصے میں کیپ نیوینہم کے مقام پر قائم لانگ رینج ریڈار سائٹ کے ایئرپورٹ پر گر کر تباہ ہوا۔
حادثے کے بعد امدادی ٹیمیں جائے وقوعہ پر پہنچیں، جہاں انہوں نے تمام 8 افراد کی ہلاکت کی تصدیق کردی۔ حکام کے مطابق حادثے میں کوئی شخص زندہ نہیں بچا۔
فوج نے فوری طور پر یہ تفصیلات جاری نہیں کیں کہ طیارے میں سوار افراد ریڈار سائٹ پر کس مقصد کے لیے موجود تھے۔ مذکورہ مقام الاسکا کی فضائی حدود میں پرواز کرنے والے طیاروں کی نگرانی اور ٹریکنگ کے لیے استعمال ہوتا ہے۔
الاسکا کمانڈ کے ترجمان کے مطابق حادثے کی وجوہات جاننے کے لیے تحقیقات شروع کردی گئی ہیں، جبکہ ہلاک ہونے والوں کی شناخت ان کے اہلِ خانہ کو اطلاع دینے کے بعد ظاہر کی جائے گی۔
الاسکا کمانڈ کے سربراہ لیفٹیننٹ جنرل رابرٹ ڈیوس نے حادثے پر افسوس کا اظہار کرتے ہوئے کہا کہ یہ فوجی خاندان اور ان کمیونٹیز کے لیے ایک بڑا صدمہ ہے جن کی امریکی فوج خدمت کرتی ہے۔
انہوں نے کہا کہ حادثے کا شکار ہونے والے افراد ایک سخت ماحول میں اہم مشن انجام دینے والے پیشہ ور افراد تھے۔
