سندھ ہائیکورٹ نے سندھ پبلک سروس کمیشن کے کمبائنڈ کمپیٹیٹو ایگزامینیشن (CCE) 2024 سے متعلق تمام ریکارڈ سیل کرنے کا حکم جاری کر دیا ہے۔
عدالت نے اس معاملے پر سیکرٹری سندھ پبلک سروس کمیشن اور کنٹرولر امتحانات کو طلب کرتے ہوئے ہدایت دی کہ آئندہ سماعت پر مکمل ریکارڈ اور تمام متعلقہ شواہد پیش کیے جائیں۔ عدالت نے ریمارکس میں کہا کہ CCE 2024 کے نتائج کے حوالے سے سنجیدہ نوعیت کے خدشات سامنے آئے ہیں جن کا جائزہ ضروری ہے۔
مزید برآں، عدالت نے سندھ پبلک سروس کمیشن کی جانب سے 6 مئی کو جاری کردہ پریس ریلیز پر عمل درآمد بھی معطل کرنے کا حکم دے دیا۔
درخواست گزار کے وکیل نے عدالت میں مؤقف اختیار کیا کہ کمیشن نے مبینہ طور پر بعض “من پسند” امیدواروں کو کامیاب قرار دیا ہے، جس پر سوالات اٹھائے جا رہے ہیں۔
عدالت نے وزیراعلیٰ سندھ کے پرنسپل سیکرٹری، چیئرمین سندھ پبلک سروس کمیشن، ایڈووکیٹ جنرل سندھ سمیت دیگر متعلقہ فریقین کو نوٹس جاری کرتے ہوئے 21 مئی تک جواب جمع کرانے کا حکم دیا ہے۔
