موسمیاتی تبدیلی کا حل پاکستان کی بقا اور ترقی کے لیے ناگزیر قرار دے دیا گیا ہے۔ پنجاب کی سینئر وزیر مریم اورنگزیب نے عالمی یوم ماحولیات کے موقع پر لاہور میں پریس کانفرنس کرتے ہوئے کہا کہ حکومت موسمیاتی بحران کے حل کے لیے بھرپور اقدامات کر رہی ہے۔
100 ارب روپے کی خطیر رقم مختص
مریم اورنگزیب نے کہا کہ موسمیاتی تبدیلی کا حل حکومت پنجاب کی اولین ترجیح ہے۔ اس حوالے سے 100 ارب روپے مختص کیے گئے ہیں تاکہ ماحولیاتی تباہ کاریوں سے نمٹا جا سکے۔
انہوں نے بتایا کہ ماضی میں محکمہ ماحولیات کو نہ تو وسائل فراہم کیے گئے اور نہ ہی توجہ دی گئی، مگر موجودہ وزیراعلیٰ پنجاب نے صرف محکمہ ماحولیات کے لیے 20 ارب روپے کا خصوصی فنڈ منظور کیا ہے۔
پلانٹ فار پاکستان، ایئر کوالٹی مانیٹرز اور انوائرمنٹل فورس
وزیر ماحولیات نے بتایا کہ “پلانٹ فار پاکستان” جیسے منصوبوں کے تحت عملی اقدامات جاری ہیں۔ لاہور اور دیگر بڑے شہروں میں 50 جدید ایئر مانیٹرز نصب کیے جا چکے ہیں تاکہ فضائی آلودگی کی نگرانی کی جا سکے۔
انہوں نے مزید کہا کہ انوائرمنٹل فورس کو بھی مکمل طور پر ضروری آلات و سازوسامان سے لیس کر دیا گیا ہے تاکہ ماحولیاتی قوانین پر سختی سے عمل درآمد ہو سکے۔
پانی کی بچت، مستقبل کی ضمانت
مریم اورنگزیب نے کہا کہ ہمیں پانی کی بچت کے لیے آج فیصلہ کرنا ہوگا۔ صاف پانی ہماری زندگی کی بنیادی ضرورت ہے، اور اس کے ذخائر بڑھانے اور ضیاع کو روکنے کے لیے جلد اقدامات کرنے ہوں گے۔
انہوں نے کہا کہ آنے والی نسلوں کے لیے پانی چھوڑ کر جانا ہمارا قومی فریضہ ہے، ورنہ موسمیاتی تبدیلی کے اثرات مزید سنگین ہو جائیں گے۔
