واشنگٹن ڈی سی میں وائٹ ہاؤس کورسپونڈنٹس ڈنر کے دوران پیش آنے والے فائرنگ کے واقعے نے سیکیورٹی صورتحال پر تشویش پیدا کر دی، تاہم امریکی صدر ڈونلڈ ٹرمپ اور ان کی کابینہ مکمل طور پر محفوظ رہی۔
صدر ٹرمپ کے مطابق ایک مشتبہ شخص “متعدد ہتھیاروں سے لیس” ہو کر سیکیورٹی چیک پوائنٹ کی طرف بڑھا، جس کے بعد فائرنگ کا واقعہ پیش آیا۔ سیکیورٹی اہلکاروں نے فوری کارروائی کرتے ہوئے صدر کو اسٹیج سے ہٹا کر محفوظ مقام پر منتقل کر دیا۔
حکام کے مطابق ملزم کو موقع پر ہی حراست میں لے لیا گیا ہے۔ واشنگٹن کی ڈسٹرکٹ اٹارنی جینین پیرو نے بتایا کہ ملزم پر دورانِ جرم اسلحہ استعمال کرنے اور خطرناک ہتھیار کے ذریعے وفاقی اہلکار پر حملہ کرنے کے الزامات عائد کیے جائیں گے۔ قانون نافذ کرنے والے اداروں نے ملزم کی شناخت کیلیفورنیا سے تعلق رکھنے والے 31 سالہ شخص کے طور پر کی ہے۔
واقعے کے عینی شاہدین میں وولف بلٹزر بھی شامل تھے، جو واشنگٹن ہلٹن کے بال روم کے باہر موجود تھے۔ انہوں نے بتایا کہ ایک مسلح شخص نے ان سے چند فٹ کے فاصلے پر فائرنگ شروع کر دی، جس کے بعد درجنوں افراد نے فوری طور پر زمین پر لیٹ کر پناہ لی جبکہ سیکیورٹی اہلکار موقع پر پہنچ گئے۔
ذرائع کے مطابق یونائیٹڈ اسٹیٹس سیکرٹ سروس کا ایک اہلکار حملے کے دوران اپنی حفاظتی جیکٹ کے باوجود گولی لگنے سے زخمی ہوا، جسے فوری طور پر اسپتال منتقل کر دیا گیا ہے۔
