لاڈرہل: ویسٹ انڈیز نے پہلے ٹیسٹ میں پاکستان کو 90 رنز سے شکست دے کر سیریز کا فاتحانہ آغاز کر دیا۔ برائن لارا کرکٹ اکیڈمی میں کھیلے گئے میچ میں پاکستان کی بیٹنگ آخری اننگز میں مکمل طور پر ناکام رہی اور 211 رنز کا ہدف حاصل کرنے کے بجائے پوری ٹیم صرف 120 رنز پر آؤٹ ہوگئی۔
پاکستان کی جانب سے ہدف کے تعاقب میں ابتدا ہی سے وکٹیں گرنے کا سلسلہ شروع ہوگیا۔ اذان اویس، امام الحق اور شان مسعود صرف 3، 3 رنز بنا سکے، جبکہ سلمان آغا کھاتہ کھولے بغیر پویلین لوٹ گئے۔
مڈل اور لوئر آرڈر بھی مزاحمت نہ کرسکا۔ علی عثمان 2، خرم شہزاد 4، جبکہ عامر جمال اور محمد علی صفر پر آؤٹ ہوئے۔ کپتان بابر اعظم نے ایک جانب ڈٹ کر کھیلتے ہوئے ناقابل شکست 58 رنز بنائے، تاہم انہیں دوسرے اینڈ سے کسی بھی بلے باز کا خاطر خواہ ساتھ نہ مل سکا۔ پاکستان کے آٹھ کھلاڑی ڈبل فیگر میں بھی داخل نہ ہو سکے۔
بابر اعظم کی شکست پر پہلی واک
میچ کے بعد پریس کانفرنس میں قومی کپتان بابر اعظم نے کہا کہ ٹیم نے مجموعی طور پر اچھی کرکٹ کھیلی، لیکن آخری روز بیٹنگ لائن اپ توقعات پر پورا نہیں اتری۔
انہوں نے کہا کہ نئی گیند کے خلاف مشکلات کا اندازہ تھا، مگر مسلسل وکٹیں گرنے سے دباؤ بڑھتا گیا۔ بابر کے مطابق 211 رنز کا ہدف قابلِ حصول تھا، تاہم ٹیم اس موقع سے فائدہ نہ اٹھا سکی۔ انہوں نے اگلے ٹیسٹ میں بھرپور کم بیک کا عزم بھی ظاہر کیا۔
ویسٹ انڈیز کی دوسری اننگز
چوتھے روز ویسٹ انڈیز نے 7 وکٹوں پر 126 رنز سے اپنی دوسری اننگز دوبارہ شروع کی اور پوری ٹیم 181 رنز پر آؤٹ ہوگئی، یوں میزبان ٹیم نے پاکستان کو جیت کے لیے 211 رنز کا ہدف دیا۔
پاکستان کی جانب سے محمد عباس نے شاندار بولنگ کرتے ہوئے پانچ وکٹیں حاصل کیں، جبکہ خرم شہزاد اور محمد علی نے دو، دو کھلاڑیوں کو آؤٹ کیا۔
پہلی اننگز میں ویسٹ انڈیز نے 311 رنز اسکور کیے تھے، جس کے جواب میں پاکستان کی ٹیم 282 رنز بنا کر آؤٹ ہوگئی تھی، تاہم دوسری اننگز میں بیٹنگ کی ناکامی قومی ٹیم کو شکست سے نہ بچا سکی۔
