کراچی: ٹھٹھہ سیمنٹ کمپنی لمیٹڈ نے اپنے روایتی سیمنٹ کاروبار سے ہٹ کر ایک نئے صنعتی شعبے میں قدم رکھ دیا ہے۔ کمپنی نے اعلان کیا ہے کہ وہ بیلاروس برانڈ کے ٹریکٹرز کی بلوچستان میں مقامی سطح پر اسمبلنگ اور پیداوار شروع کرے گی۔
ٹھٹھہ سیمنٹ کی جانب سے پاکستان اسٹاک ایکسچینج (PSX) کو جمع کرائے گئے اعلامیے کے مطابق، کمپنی کی مکمل ذیلی کمپنی منسک ورک ٹریکٹر اینڈ اسمبلنگ (پرائیویٹ) لمیٹڈ (MWTA) نے بیلاروس کی معروف کمپنی منسک ٹریکٹر ورکس (MTZ) کے ساتھ ایک خصوصی معاہدہ کیا ہے۔ اس معاہدے کے تحت MWTA کو بلوچستان میں بیلاروس ٹریکٹرز کی اسمبلنگ اور تیاری کا واحد حق حاصل ہوگا۔
ذرائع کے مطابق، آئندہ پانچ سال کے دوران مارکیٹ میں تقریباً 2,800 ٹریکٹر یونٹس کی طلب متوقع ہے جو زرعی پیداوار اور مشین کاری کے لیے اعلیٰ طاقت والی مشینری کی بڑھتی ہوئی ضرورت کی عکاسی کرتی ہے۔
کمپنی کے مطابق، یہ منصوبہ بلوچستان میں صنعتی ترقی، روزگار کے مواقع اور ٹیکنالوجی کی منتقلی کے فروغ کے لیے ایک اہم سنگ میل ثابت ہوگا۔ ٹھٹھہ سیمنٹ کا کہنا ہے کہ یہ اقدام طویل المدتی اسٹریٹجک فیصلے کا حصہ ہے جس کا مقصد کمپنی کے کاروبار کو سیمنٹ انڈسٹری سے آگے بڑھا کر متنوع بنانا ہے۔
تجزیہ کاروں کا کہنا ہے کہ اگرچہ پاکستان میں مختلف شعبوں میں کاروباری تنوع عام ہے، مگر ایک سیمنٹ کمپنی کی جانب سے ٹریکٹر اسمبلنگ میں داخلہ غیر معمولی پیش رفت ہے۔
ذرائع کے مطابق، یہ منصوبہ ایسے وقت میں سامنے آیا ہے جب پاکستان کی زرعی مشین سازی کی صنعت کو موسمی تبدیلیوں، مالیاتی مسائل اور پالیسی کے عدم تسلسل جیسے چیلنجز کا سامنا ہے، تاہم ٹریکٹرز کی طلب اب بھی ملک کے زرعی ڈھانچے سے منسلک ہے۔
ٹھٹھہ سیمنٹ کے مطابق، کمپنی کا مقصد بلوچستان میں صنعتی بنیادوں کو مضبوط کرنا اور صوبے میں نئے روزگار کے مواقع پیدا کرنا ہے۔ منصوبے پر ابتدائی کام آئندہ چند ماہ میں شروع ہونے کی توقع ہے۔
ٹھٹھہ سیمنٹ کمپنی لمیٹڈ (ٹی ایچ سی سی ایل) پاکستان میں 1980 میں پبلک لمیٹڈ کمپنی کے طور پر قائم ہوئی تھی اور یہ سیمنٹ کی پیداوار اور مارکیٹنگ کے ساتھ ساتھ ٹھٹھہ پاور (پرائیویٹ) لمیٹڈ کی ملکیت بھی رکھتی ہے
