لیڈز: پاکستان کرکٹ ٹیم کی ٹیسٹ کرکٹ میں ناقص کارکردگی کا سلسلہ جاری ہے، جہاں لیڈز ٹیسٹ کے تیسرے ہی روز انگلینڈ نے پاکستان کو اننگز اور 103 رنز سے شکست دے دی۔
پاکستانی ٹیم انگلینڈ کی جانب سے دی گئی 238 رنز کی برتری کے دباؤ سے نہ نکل سکی اور دوسری اننگز میں محض 135 رنز پر پوری ٹیم پویلین لوٹ گئی۔ محمد رضوان 41 رنز کے ساتھ نمایاں رہے، جبکہ شان مسعود نے 29، عبداللہ شفیق نے 15 اور سعود شکیل نے 14 رنز بنائے۔
پاکستان کی بیٹنگ کا اندازہ اس بات سے لگایا جا سکتا ہے کہ پہلی اننگز میں 5 جبکہ دوسری اننگز میں 6 پاکستانی بیٹرز ڈبل فگر میں بھی داخل نہ ہوسکے۔ امام الحق دوسری اننگز میں بھی صفر پر آؤٹ ہوئے، جبکہ پہلی اننگز میں صفر پر پویلین لوٹنے والے اذان اویس صرف 9 رنز بنا سکے۔ کپتانی کی ذمہ داری سنبھالنے والے سلمان علی آغا بھی دونوں اننگز میں مجموعی طور پر صرف 25 رنز بنا سکے۔
انگلینڈ کی جانب سے اولی رابنسن، جوفرا آرچر اور جوش ٹونگ نے تین، تین وکٹیں حاصل کیں، جبکہ ڈین لارنس نے ایک پاکستانی بیٹر کو آؤٹ کیا۔ رابنسن اور جوش ٹونگ نے میچ میں مجموعی طور پر 8، 8 وکٹیں حاصل کرکے پاکستانی بیٹنگ لائن کو شدید مشکلات سے دوچار کیا۔
اس سے قبل انگلینڈ نے اپنی پہلی اننگز میں 409 رنز بنا کر پاکستان پر 238 رنز کی برتری حاصل کی تھی۔ ہیری بروک 91 رنز کے ساتھ ٹاپ اسکورر رہے، جورڈن کاکس نے 71، کپتان جو روٹ نے 66 اور ڈین لارنس نے 51 رنز بنائے۔
جو روٹ نے 10 چوکوں کی مدد سے 66 رنز کی اننگز کھیل کر ٹیسٹ کرکٹ میں اپنی 68ویں نصف سنچری مکمل کی اور بھارتی لیجنڈ سچن ٹنڈولکر کے 68 نصف سنچریوں کے ریکارڈ کی برابری کرلی۔
پاکستان کی جانب سے علی عثمان نے 5، خرم شہزاد نے 3 جبکہ محمد عباس اور محمد علی نے ایک، ایک وکٹ حاصل کی۔
واضح رہے کہ بابراعظم کی عدم دستیابی کے باعث سلمان علی آغا نے اس میچ میں پاکستان کی قیادت کی۔ بیرونِ ملک ٹیسٹ کرکٹ میں پاکستان کی حالیہ کارکردگی بھی تشویشناک ہے اور ٹیم گزشتہ 10 میں سے 9 ٹیسٹ میچز ہار چکی ہے۔
پاکستان اور انگلینڈ کے درمیان سیریز کا دوسرا ٹیسٹ 27 سے 31 اگست تک لارڈز میں کھیلا جائے گا، جبکہ تیسرا اور آخری ٹیسٹ 9 سے 13 ستمبر تک برمنگھم میں شیڈول ہے۔
