چین کے جنوبی خودمختار علاقے گوانگشی میں مسلسل موسلا دھار بارشوں اور شدید سیلاب نے بڑے پیمانے پر تباہی مچادی ہے۔ حکام کے مطابق جمعرات تک ہلاکتوں کی تعداد بڑھ کر 39 ہو گئی ہے، جبکہ 9 افراد تاحال لاپتا ہیں۔
چینی خبر رساں ایجنسی شِنہوا کے مطابق سب سے زیادہ جانی نقصان نان ننگ شہر کے قریب لیولان آبی ذخیرے کے بند ٹوٹنے سے ہوا، جہاں اچانک آنے والے سیلابی ریلے نے زیریں علاقوں کو اپنی لپیٹ میں لے لیا۔ اس واقعے میں کم از کم 26 افراد جان کی بازی ہار گئے جبکہ 7 افراد لاپتا ہیں۔
سرکاری ٹی وی سی سی ٹی وی کی جاری کردہ ویڈیوز میں دریاؤں میں طغیانی، زیرِ آب مکانات، تباہ شدہ انفراسٹرکچر اور امدادی کارروائیاں دکھائی گئیں، جہاں ریسکیو اہلکار ربڑ کی کشتیوں کے ذریعے متاثرہ افراد تک خوراک اور دیگر ضروری سامان پہنچا رہے ہیں۔
اگرچہ لیولان میں سیلابی پانی کافی حد تک اتر چکا ہے، تاہم متاثرہ علاقوں کی سڑکیں اور رہائشی مکانات اب بھی موٹی کیچڑ سے ڈھکے ہوئے ہیں۔ مقامی شہری اپنے گھروں کی صفائی اور نقصان کا ازالہ کرنے میں مصروف ہیں، جبکہ کئی مقامات پر ملبہ ہٹانے کے لیے بھاری مشینری اور بلڈوزرز کا استعمال کیا جا رہا ہے۔
حکام نے متاثرین کی امداد کے لیے خوراک، بارش سے بچاؤ کے لباس، ربڑ کی کشتیاں اور دیگر ضروری سامان روانہ کر دیا ہے، جبکہ لاپتا افراد کی تلاش اور امدادی سرگرمیاں تاحال جاری ہیں۔
