ریاض: سعودی ولی عہد اور وزیراعظم، پبلک انویسٹمنٹ فنڈ کے بورڈ آف ڈائریکٹرز کے چیئرمین شہزادہ محمد بن سلمان نے سعودی عرب کی پہلی مقامی طور پر تیار کردہ الیکٹرک گاڑی ’ایکسو بوٹ‘ متعارف کرادی۔
یہ گاڑی سعودی عرب میں ہی ڈیزائن اور انجینیئر کی گئی ہے، جسے ملک میں آٹو موبائل صنعت اور برقی گاڑیوں کے شعبے میں مقامی صلاحیتوں کے فروغ کی جانب اہم پیش رفت قرار دیا جا رہا ہے۔
’ایکسو بوٹ‘ کی تیاری کے لیے مینوفیکچرنگ مرکز کنگ سلمان آٹوموٹیو انڈسٹری کمپلیکس میں قائم کیا گیا ہے۔ یہ کمپلیکس سعودی عرب میں جدید گاڑیوں کی تیاری کے لیے بڑے صنعتی مراکز میں شامل ہونے کی جانب پیش رفت کر رہا ہے۔
منصوبے کا مقصد سعودی عرب میں گاڑیوں کی مقامی تیاری، انجینیئرنگ اور جدید ٹیکنالوجی کے شعبوں کو فروغ دینا اور آٹو موبائل صنعت میں مقامی ویلیو چین کو مضبوط بنانا ہے۔
سعودی عرب کی جانب سے برقی گاڑیوں کے شعبے میں سرمایہ کاری کو ملک کے وسیع تر صنعتی اور معاشی منصوبوں سے بھی جوڑا جا رہا ہے، جس کے تحت روایتی تیل پر انحصار کم کرنے، نئی صنعتوں کو فروغ دینے اور جدید ٹیکنالوجی کے شعبوں میں مقامی صلاحیت پیدا کرنے پر توجہ دی جارہی ہے۔
کنگ سلمان آٹوموٹیو انڈسٹری کمپلیکس میں قائم مینوفیکچرنگ مرکز مستقبل میں برقی گاڑیوں کی تیاری کے ساتھ ساتھ آٹو موبائل صنعت سے وابستہ دیگر سرگرمیوں کے لیے بھی اہم کردار ادا کرسکتا ہے۔
’ایکسو بوٹ‘ کی رونمائی ایسے وقت میں ہوئی ہے جب سعودی عرب برقی گاڑیوں اور جدید نقل و حمل کے شعبے میں اپنی موجودگی بڑھانے کے لیے بڑے منصوبوں پر کام کر رہا ہے۔ اس پیش رفت سے ملک میں مقامی مینوفیکچرنگ، روزگار اور آٹو موبائل سے متعلق ٹیکنالوجی کی منتقلی کے نئے مواقع پیدا ہونے کی توقع کی جارہی ہے۔
