ایران کی معیشت ایک کڑے امتحان سے گزر رہی ہے جہاں ایک طرف جنگ اور پابندیوں نے اسے شدید دباؤ میں ڈال دیا ہے، وہیں دوسری جانب تیل کی آمدنی اسے سہارا دے رہی ہے۔ امریکا کی طویل عرصے سے جاری معاشی پابندیوں کے باوجود، مشرقِ وسطیٰ میں جاری حالیہ کشیدگی کے چھ ہفتے بعد بھی ایران مکمل طور پر معاشی طور پر نہیں گرا۔
امریکی اور اسرائیلی حملوں نے ایران کے صنعتی اور تجارتی نظام کو مزید کمزور کیا، لیکن تیل کی برآمدات مسلسل جاری رہیں، جس نے حکومت کو مالی طور پر سنبھالا دیا۔ اس صورتحال میں آبنائے ہرمز ایک اہم محاذ بن چکی ہے، جہاں کنٹرول حاصل کرنا دراصل معاشی دباؤ بڑھانے کے مترادف ہے۔
اسی دوران سفارتی سطح پر جاری مذاکرات میں پابندیوں میں نرمی، اربوں ڈالر کے منجمد اثاثے اور ممکنہ جنگی ہرجانے جیسے معاملات فیصلہ کن حیثیت اختیار کر چکے ہیں۔ تاہم ان تمام حالات کا سب سے زیادہ اثر عام ایرانی عوام پر پڑ رہا ہے، جو مہنگائی، اشیائے ضروریہ کی قلت اور کرنسی کی گرتی قدر جیسے مسائل کا سامنا کر رہے ہیں۔
