اسلام آباد: خیبر پختونخوا میں ایمرجنسی کے نفاذ سے متعلق معاملے پر غور کے لیے سینیٹ اور قومی اسمبلی کے اجلاس آج شام طلب کر لیے گئے ہیں، جہاں حتمی فیصلہ آئینی طریقہ کار کے تحت کیے جانے کا امکان ہے۔
تفصیلات کے مطابق سینیٹ اور قومی اسمبلی کے الگ الگ اجلاس آج شام 6 بج کر 15 منٹ پر ہوں گے۔ اس سلسلے میں پاکستان مسلم لیگ (ن) کی پارلیمانی کمیٹی کا اجلاس بھی آج شام طلب کیا گیا ہے، جبکہ پاکستان پیپلز پارٹی کے ارکانِ پارلیمنٹ کا اجلاس ایوانِ صدر میں ہوگا۔
پیپلز پارٹی کے رہنما نیر بخاری کا کہنا ہے کہ خیبر پختونخوا کی حکومت امن و امان برقرار رکھنے میں ناکام ہو چکی تھی۔ ان کے مطابق دہشت گردی کے خلاف کارروائیوں میں مبینہ عدم تعاون کا معاملہ بھی موجود تھا۔
نیر بخاری نے کہا کہ غیر معمولی حالات میں آئینی دفعات کا استعمال ناگزیر ہو سکتا ہے۔
خیبر پختونخوا میں ایمرجنسی کے نفاذ سے متعلق حتمی فیصلہ آئینی طریقہ کار کے مطابق کیے جانے کا معاملہ آج پارلیمنٹ میں زیرِ غور آئے گا۔
