اسلام آباد: ایران کے وزیر خارجہ عباس عراقچی عمان کا دورہ مکمل کرنے کے بعد ایک بار پھر پاکستان کے دارالحکومت اسلام آباد پہنچ گئے، جہاں وہ ایران کے خلاف جاری امریکہ-اسرائیل جنگ کے تناظر میں علاقائی قیادت سے اہم مشاورت کر رہے ہیں۔
میڈیا رپورٹس کے مطابق عباس عراقچی نے عمان کے دارالحکومت مسقط میں اعلیٰ حکام سے ملاقاتیں کیں، جن میں خطے کی سیکیورٹی صورتحال، آبنائے ہرمز اور جاری کشیدگی پر تبادلہ خیال کیا گیا۔ ان ملاقاتوں میں ایران نے خطے میں غیر ملکی مداخلت کو عدم استحکام کی بنیادی وجہ قرار دیا۔
ذرائع کے مطابق ایرانی وزیر خارجہ کا دوبارہ اسلام آباد آنا سفارتی سرگرمیوں کے تسلسل کا حصہ ہے، جہاں پاکستان امریکہ اور ایران کے درمیان کشیدگی کم کرنے کے لیے ثالثی کردار ادا کر رہا ہے۔
رپورٹس کے مطابق عباس عراقچی اس سے قبل بھی اسلام آباد میں پاکستانی قیادت سے ملاقاتیں کر چکے ہیں، تاہم مذاکراتی عمل میں تعطل کے باعث انہوں نے عمان کا دورہ کیا اور اب دوبارہ مشاورت کے لیے پاکستان واپس آئے ہیں۔
سفارتی ذرائع کا کہنا ہے کہ یہ دورہ خطے میں جاری کشیدگی کو کم کرنے اور ممکنہ مذاکراتی عمل کو بحال کرنے کی کوششوں کا حصہ ہے، جبکہ پاکستان، عمان اور دیگر علاقائی ممالک اس عمل میں اہم کردار ادا کر رہے ہیں۔
یاد رہے کہ ایران، امریکہ اور اسرائیل کے درمیان جاری کشیدگی کے باعث خطے کی صورتحال انتہائی حساس ہو چکی ہے، اور عالمی سطح پر اس بحران کے حل کے لیے سفارتی کوششیں تیز کر دی گئی ہیں۔
