سعودی عرب میں ذوالحج 1447 ہجری کا چاند نظر آنے کی تصدیق ہو گئی ہے، جس کے بعد یکم ذوالحج پیر 18 مئی 2026 کو ہوگی جبکہ حج کا سب سے اہم رکن وقوفِ عرفہ منگل 26 مئی 2026 کو ادا کیا جائے گا۔ سعودی عرب اور پاکستان دونوں میں عیدالاضحیٰ بدھ 27 مئی 2026 کو منائی جائے گی۔
سعودی سپریم کورٹ نے مملکت بھر کے مسلمانوں سے اپیل کی تھی کہ وہ اتوار 17 مئی 2026 کی شام ذوالحج کا چاند دیکھنے کی کوشش کریں۔ سعودی پریس ایجنسی کے مطابق، ہدایت دی گئی تھی کہ جو بھی شخص چاند کو آنکھ یا دوربین سے دیکھے وہ اپنی شہادت قریبی عدالت یا سرکاری مرکز میں درج کرائے۔
ادھر سعودی عرب کے مفتی اعظم شیخ صالح الفوزان نے مسلمانوں کو ہدایت کی کہ ذوالحج کے ابتدائی دس دن عبادت، نماز، روزہ، صدقہ اور ذکرِ الٰہی میں زیادہ سے زیادہ وقت گزاریں۔ انہوں نے کہا کہ ان دنوں کے اعمال اللہ کے نزدیک خاص فضیلت رکھتے ہیں۔ انہوں نے یوم عرفہ کے روزے کو دو سال کے گناہوں کے کفارے کا ذریعہ قرار دیتے ہوئے اس کی اہمیت بھی اجاگر کی۔ ساتھ ہی انہوں نے ہدایت کی کہ قربانی کرنے والے افراد ذوالحج کے آغاز سے قربانی مکمل ہونے تک بال، ناخن یا جسمانی بال نہ کاٹیں۔
دوسری جانب پاکستان میں بھی مرکزی رویت ہلال کمیٹی نے ذوالحج کا چاند نظر آنے کا اعلان کر دیا ہے۔ کراچی میں محکمہ موسمیات کے دفتر میں کمیٹی کا اجلاس منعقد ہوا جس کی صدارت چیئرمین مولانا عبدالخبیر آزاد نے کی۔ اجلاس میں زونل رویت ہلال کمیٹیوں، محکمہ موسمیات اور سپارکو کے ماہرین نے بھی شرکت کی۔
اسلام آباد، لاہور، کراچی، کوئٹہ اور پشاور میں زونل کمیٹیوں کے اجلاس بھی ہوئے۔ بعد ازاں مرکزی رویت ہلال کمیٹی کے چیئرمین نے ملک بھر میں ذوالحج 1447 ہجری کا چاند نظر آنے اور عیدالاضحیٰ 27 مئی 2026 بروز بدھ منانے کا باضابطہ اعلان کیا۔
