لندن: لارڈز میں پاکستان اور انگلینڈ کے درمیان جاری تین ٹیسٹ میچز کی سیریز کے دوسرے میچ میں قومی ٹیم کی بیٹنگ ایک بار پھر مشکلات کا شکار ہوگئی، پاکستان پہلی اننگز میں صرف 110 رنز پر آؤٹ ہوگیا جبکہ انگلینڈ نے 180 رنز کی بڑی برتری حاصل کرلی۔
دوسرے روز پاکستان نے اپنی اننگز کا آغاز کیا تو انگلش بولرز نے قومی بیٹرز کو سنبھلنے کا موقع نہیں دیا۔ پاکستان کی جانب سے اذان اویس 46 رنز کے ساتھ سب سے نمایاں بیٹر رہے، جبکہ سعود شکیل نے 16، کپتان بابر اعظم نے 8، محمد رضوان نے 7 اور عبداللہ شفیق نے 5 رنز بنائے۔
امام الحق انجری کے باعث بیٹنگ کے لیے میدان میں نہ اتر سکے، جس کے نتیجے میں پاکستان کی نو وکٹیں گرنے کے بعد اننگز 110 رنز پر سمٹ گئی۔
انگلینڈ کی جانب سے اولی رابنسن نے 4 وکٹیں حاصل کیں، جوفرا آرچر نے 3 جبکہ جوش ٹنگ نے 2 پاکستانی بیٹرز کو پویلین بھیجا۔
اس سے قبل پاکستان نے ٹاس جیت کر انگلینڈ کو پہلے بیٹنگ کی دعوت دی تھی۔ بارش کے باعث پہلے روز کھیل تاخیر سے شروع ہوا اور صرف 56 اوورز کا کھیل ممکن ہوسکا۔ دن کے اختتام پر انگلینڈ نے 9 وکٹوں کے نقصان پر 248 رنز بنائے تھے۔
دوسرے روز انگلینڈ نے 248 رنز 9 کھلاڑی آؤٹ سے اپنی اننگز دوبارہ شروع کی۔ آخری وکٹ گس اٹکنسن کی گری، جو 45 رنز بنا کر علی عثمان کی گیند پر محمد علی کے ہاتھوں کیچ ہوگئے۔ یوں انگلینڈ کی پوری ٹیم 66.4 اوورز میں 290 رنز بنا کر آؤٹ ہوگئی۔
انگلینڈ کی جانب سے جیمی اسمتھ 61 اور جارڈن کاکس 55 رنز کے ساتھ نمایاں رہے۔
پہلے روز پاکستانی بولرز نے عمدہ کارکردگی کا مظاہرہ کیا تھا۔ محمد عباس نے 15 اوورز میں 56 رنز دے کر 4 وکٹیں حاصل کیں، محمد علی نے 17 اوورز میں 67 رنز کے عوض 3 کھلاڑیوں کو آؤٹ کیا جبکہ خرم شہزاد نے ایک وکٹ حاصل کی۔
انگلینڈ کی ابتدائی بیٹنگ کو محمد عباس نے شدید نقصان پہنچایا۔ بین ڈکٹ 17، ایمیلیو گے 8 اور انگلش کپتان جو روٹ صرف 4 رنز بنا سکے۔
پاکستان اب پہلی اننگز میں خسارے میں جانے کے بعد میچ میں واپسی کے لیے انگلینڈ کو جلد آؤٹ کرنے اور دوسری اننگز میں بہتر بیٹنگ کرنے کی کوشش کرے گا۔
