اسلام آباد: پاکستان نے کہا ہے کہ ایران اور امریکہ کے درمیان تنازعات کے خاتمے اور کشیدگی کم کرنے کے لیے دونوں ممالک سے رابطے جاری ہیں اور امید ہے کہ فریقین دوبارہ مذاکرات کی میز پر آئیں گے۔
ترجمان دفتر خارجہ طاہر اندرابی نے بدھ کو ہفتہ وار میڈیا بریفنگ کے دوران کہا کہ پاکستان امریکہ اور ایران دونوں کے ساتھ مسلسل رابطے میں ہے اور انہیں اپنے اختلافات مذاکرات کے ذریعے حل کرنے پر زور دے رہا ہے۔
انہوں نے کہا کہ پاکستان کو مثبت توقع ہے کہ دونوں فریق تنازعات کے حل کے لیے دوبارہ مذاکرات کی میز پر واپس آئیں گے۔
طاہر اندرابی کے مطابق آرمی چیف جنرل عاصم منیر کے گزشتہ ماہ دورۂ تہران کے بعد آبنائے ہرمز سے متعلق معاملات میں پیش رفت اور سفارتی سرگرمیوں میں خاصی تیزی آئی ہے۔
ترجمان دفتر خارجہ کا یہ بیان ایسے وقت میں سامنے آیا ہے جب امریکہ اور ایران کے درمیان کشیدگی ایک بار پھر شدت اختیار کر گئی ہے۔
امریکی فوج نے بدھ کو اعلان کیا کہ ایران کے خلاف حملوں کی تازہ کارروائی مکمل کر لی گئی ہے، جس میں پاسداران انقلاب ایران کے مختلف اہداف کو نشانہ بنایا گیا۔
دوسری جانب نائب وزیراعظم اور وزیر خارجہ اسحاق ڈار نے منگل کو ایران اور امریکہ دونوں پر زور دیا تھا کہ وہ مفاہمتی یادداشت پر خلوص نیت کے ساتھ عمل درآمد کریں۔
اسحاق ڈار کا کہنا تھا کہ موجودہ صورتحال میں کشیدگی کم کرنے اور تنازعات کے حل کے لیے مفاہمتی یادداشت پر عمل درآمد ہی آگے بڑھنے کا واحد مؤثر راستہ ہے۔
