بین الاقوامی: امریکی صدر ڈونلڈ ٹرمپ نے مبینہ طور پر سعودی ولی عہد شہزادہ محمد بن سلمان کی بحیرۂ احمر میں حوثیوں کے خلاف امریکی کارروائی کی درخواست مسترد کردی۔
امریکی نیوز ویب سائٹ ایکسیوس کے مطابق سعودی ولی عہد نے بحیرۂ احمر میں حوثیوں سے لاحق خطرے کے معاملے پر گزشتہ روز امریکی صدر سے دو مرتبہ ٹیلی فون پر رابطہ کیا۔
رپورٹ میں دعویٰ کیا گیا ہے کہ محمد بن سلمان نے ٹرمپ پر زور دیا کہ امریکہ حوثیوں کے خلاف کارروائی کرے، تاہم امریکی صدر نے فی الحال ایسی کارروائی سے انکار کردیا۔
ایکسیوس کے مطابق حالیہ ہفتوں کے دوران امریکی عسکری اور سول حکام نے حوثیوں کے خطرے کے حوالے سے سعودی حکام سے رابطے بھی کیے ہیں۔
رپورٹ میں بتایا گیا ہے کہ امریکی سینٹرل کمانڈ کے کمانڈر ایڈمرل بریڈ کوپر بھی ہنگامی رابطہ اجلاسوں میں شرکت کے لیے گزشتہ روز سعودی عرب پہنچے۔
دوسری جانب واشنگٹن میں سعودی سفارت خانے اور وائٹ ہاؤس نے اس معاملے پر تبصرہ کرنے سے گریز کیا ہے۔
واضح رہے کہ چند روز قبل یمن کے حوثی گروپ انصاراللہ کی جانب سے سعودی عرب میں حملوں کی اطلاعات سامنے آئی تھیں، جن کے نتیجے میں 73 افراد زخمی ہوئے، جن میں خواتین اور بچے بھی شامل تھے۔
تاہم امریکی صدر کی جانب سے سعودی درخواست مسترد کیے جانے کی اطلاعات کی آزاد ذرائع سے باضابطہ تصدیق سامنے نہیں آئی، اس لیے یہ دعویٰ امریکی میڈیا رپورٹ سے منسوب ہے۔
