غزہ کے ساحل پر بیٹھے معصوم فلسطینی بچے صمود فلوٹیلا کا انتظار کرتے رہ گئےاور رات کی تاریکی میں اسرائیلی فوج نے 40 سے زائد کشتیوں پر مشتمل گلوبل صمودفلوٹیلا کو گھیرے میں لیا اور کئی کشتیوں پر پانی کی توپیں چلائیں۔فلوٹیلا منتظمین کے مطابق اسرائیلی فوجی ایک جہاز میں داخل ہوئے اور جہاز پر سوار تمام ارکان کو حراست میں لے لیا۔

گلوبل صمود فلوٹیلا کیا ہے؟

جولائی 2025 میں ترکی کے ساحل سے روانہ ہونے والا “گلوبل صمود فلوٹیلا” اب تک کا سب سے بڑا شہری بحری مشن تھا، جس کا مقصد اسرائیل کے غیر قانونی محاصرے کو توڑ کر غزہ کے مظلوم عوام تک انسانی امداد پہنچانا تھا۔ اس مشن میں 44 ممالک سے 500 سے زائد افراد شامل تھے، جن میں ڈاکٹرز، وکلاء، فنکار، ماہی گیر، اراکین پارلیمنٹ، اور انسانی حقوق کے کارکن شامل تھے۔ مشن میں شامل شخصیات میں سویڈن کی معروف ماحولیاتی کارکن گریٹا تھنبرگ، اقوام متحدہ کے سابق نمائندے پروفیسر رچرڈ فالک، اور کولمبیا کے صدر گوستاو پیٹرو بھی شامل تھے۔ پاکستان کی نمائندگی جماعت اسلامی کےسابق سینیٹر مشتاق احمد خان کر رہے تھے، جنہوں نے روانگی سے قبل اپنے ویڈیو پیغام میں کہا، “ہم موت سے آگے اور موت ہمارے پیچھے ہے، الحمدللہ ہم اللہ کی مدد سے غزہ پہنچ کے رہیں گے۔”

مشتاق احمد خان کون ہیں ؟

مشتاق احمد خان خیبر پختونخوا سے تعلق رکھنے والے ایک سرگرم سیاستدان ہیں، جنہوں نے 2018 سے 2024 تک سینیٹ میں خدمات انجام دیں۔ وہ جماعت اسلامی کے نظریاتی اور عوامی خدمت کے جذبے سے سرشار رہنما سمجھے جاتے ہیں۔ سینیٹ میں اپنی مدت کے دوران انہوں نے فلسطین، کشمیر، اور انسانی حقوق کے مسائل پر بھرپور آواز بلند کی۔ ان کی تقاریر میں ہمیشہ مظلوموں کے حق میں عالمی ضمیر کو جھنجھوڑنے کی کوشش کی گئی۔ فوٹیلا میں ان کی شرکت نہ صرف ایک علامتی اقدام تھی بلکہ پاکستان کی طرف سے فلسطینی عوام کے ساتھ عملی یکجہتی کا اظہار بھی تھا۔

پاکستان میں غزہ اور فلسطین کے حق میں جدوجہد

پاکستان میں غزہ کے حوالے سے عوامی سطح پر بھی گہری ہمدردی اور حمایت پائی جاتی ہے۔ مختلف شہروں میں فلسطینی عوام کے حق میں ریلیاں نکالی گئیں، دعائیہ اجتماعات منعقد ہوئے، اور سوشل میڈیا پر “فری فلسطین” مہم نے زور پکڑا۔ جماعت اسلامی، جمعیت علمائے اسلام، اور دیگر مذہبی و سماجی تنظیموں نے اسرائیلی مظالم کے خلاف آواز بلند کی، جبکہ انسانی حقوق کے کارکنان نے اقوام متحدہ اور عالمی اداروں سے فوری مداخلت کا مطالبہ کیا۔

گلوبل صمود فلوٹیلا کا قافلہ کب روانہ ہوا

اگست اور ستمبر میں دنیا بھر سے درجنوں کشتیوں پر مشتمل یہ قافلہ غزہ کی جانب روانہ ہوا، جسے “گلوبل مارچ ٹو غزہ”، “صمود قافلہ”، “صمود نوسانتارا”، اور “فریڈم فلوٹیلا کولیشن” جیسے تاریخی اقدامات کا تسلسل قرار دیا گیا۔ شرکاء نے مختلف بندرگاہوں سے روانہ ہو کر سمندری راستے سے ایک انسانی راہداری قائم کرنے کی کوشش کی، تاکہ ادویات اور خوراک غزہ کے نہتے اور بھوک پیاس سے نڈھال شہریوں تک پہنچائی جا سکے۔

تاہم، غزہ کے قریب پہنچنے پر اسرائیلی افواج نے فوٹیلا پر حملہ کر دیا۔ اسرائیلی نیوی نے کشتیوں کو گھیر کر ڈرونز اور کمانڈوز کے ذریعے کارروائی کی، جس کے نتیجے میں متعدد امدادی کارکنوں کو زدوکوب کیا گیا اور گرفتار کر کے اسرائیل منتقل کر دیا گیا۔ اطلاعات کے مطابق سینیٹر مشتاق احمد خان سمیت 200 سے زائد افراد کو حراست میں لے لیا گیا، جن کا رابطہ منقطع ہو گیا۔

فلوٹیلا پر حملے کے بعد دنیا بھر میں احتجاج

پاکستان میں اس واقعے پر شدید تشویش کا اظہار کیا گیا، وزیر اعظم پاکستان شہبازشریف نے اسرائیل کی جانب سے غزہ امداد لیکر جانے والے گلوبل صمود فلوٹیلا پر حملے کی شدید الفاظ میں مذمت کرتے ہوئے حراست میں لیے گئے تمام افراد کو فوری طور پر رہا کرنے کا مطالبہ کیا ہے۔

جبکہ عالمی سطح پر اس حملے کی مذمت کی گئی۔ اقوام متحدہ کے نمائندوں نے اسرائیلی کارروائی کو بین الاقوامی قوانین کی خلاف ورزی قرار دیا، اور کئی ممالک نے اسرائیل سے وضاحت طلب کی۔

گلوبل صمود فلوٹیلا کی کال پر یونان، اٹلی ، ترکیہ سمیت مختلف ممالک میں احتجاجی مظاہرے شروع ہوگئے ، مظاہرین نے صمود فلوٹیلا کے گرفتار کارکنان کے حق میں نعرے بازی اور تمام امدادی کارکنان کی فوری رہائی کا مطالبہ کردیا

یہ حملہ نہ صرف انسانی حقوق کی سنگین پامالی تھا بلکہ عالمی ضمیر کو جھنجھوڑنے والا واقعہ بھی بن گیا۔ گلوبل صمود فلوٹیلا اب ایک علامت بن چکاہے — ایک ایسی علامت جو عالمی بیانیے کو بدلنے، بین الاقوامی خاموشی کو چیلنج کرنے، اور فلسطینی عوام کے ساتھ یکجہتی کے اظہار کا ذریعہ ہے

کابل ( ڈبلیو ٹی این مانیٹرنگ ) افغانستان کے ایک دور دراز اور پہاڑی علاقے میں شدید زلزلے اور متعدد جھٹکوں کے بعد سینکڑوں مکانات منہدم ہو گئے، جس کے نتیجے میں 800 سے زائد افراد جاں بحق ہو گئے ہیں۔ طالبان حکام کے مطابق، پیر کے روز بڑے پیمانے پر ریسکیو آپریشن جاری تھا۔

امریکی جیولوجیکل سروے کے مطابق، زلزلہ سطح زمین سے محض 8 کلومیٹر کی گہرائی میں آیا اور اس کا مرکز ننگرہار صوبے کے شہر جلال آباد سے 27 کلومیٹر دور تھا۔

ننگرہار اور کنڑ صوبے پاکستان کے ساتھ سرحد پر واقع ہیں، جہاں طورخم بارڈر سے بڑی تعداد میں افغان مہاجرین واپس آ چکے ہیں، جن کے پاس اکثر روزگار یا رہائش کی سہولت نہیں ہوتی۔

زلزلے کی شدت اور مقام

زلزلہ رات گئے آیا، جس کے جھٹکے کابل سے لے کر پاکستان کے دارالحکومت اسلام آباد تک محسوس کیے گئے۔ ابتدائی زلزلے کے بعد پانچ جھٹکے مزید آئے، جن میں سب سے شدید جھٹکا 5.2 شدت کا تھا جو رات 4 بجے کے قریب آیا۔

زلزلے سے جانی و مالی نقصان

طالبان حکومت کے ترجمان ذبیح اللہ مجاہد کے مطابق، زلزلے سے سب سے زیادہ متاثرہ مشرقی صوبہ کنڑ میں 800 سے زائد افراد جاں بحق اور 2,500 زخمی ہوئے۔ ننگرہار میں مزید 12 افراد جاں بحق اور 255 زخمی ہوئے۔

وزارت داخلہ کے ترجمان عبدالمتین قانع نے بتایا کہ بہت سے مکانات تباہ ہو گئے ہیں۔ افغانستان میں اکثر لوگ کچے اور مٹی کے مکانوں میں رہتے ہیں جو زلزلے کی صورت میں آسانی سے گر جاتے ہیں۔

اقوام متحدہ کی ادارہ برائے ہجرت  کے مطابق، کنڑ کے کئی شدید متاثرہ دیہات تک سڑکیں بند ہونے کی وجہ سے رسائی ممکن نہیں۔افغان سرکاری خبر رساں ایجنسی بختار نے قدرتی آفات سے نمٹنے والے ادارے کے حوالے سے بتایا کہ نورگل، چوکئی، واتاپور، منوگئی، اور چپہ درہ سب سے زیادہ متاثرہ اضلاع میں شامل ہیں۔

افغان حکام کے مطابق کنڑ صوبے میں تین دیہات مکمل طور پر صفحہ ہستی سے مٹ گئے جبکہ دیگر علاقوں میں بھی وسیع پیمانے پر نقصان ہوا ہے۔

ریسکیو آپریشن

طالبان حکام اور اقوام متحدہ نے فوری طور پر امدادی کارروائیاں شروع کر دیں۔ وزارت دفاع کے مطابق، اب تک 40 فضائی پروازیں (فلائٹ سورٹیز) کی جا چکی ہیں۔

کنڑ کے ضلع نورگل کے زراعت کے محکمے کے ایک ملازم اعجاز الحق یاد نے بتایا کہ لوگ سڑکیں کھولنے کے لیے خود نکلے تاکہ متاثرہ علاقوں تک رسائی ممکن ہو۔ “خوف و ہراس کی کیفیت تھی، بچے اور خواتین چیخ رہے تھے، ہم نے اپنی زندگی میں ایسا منظر نہیں دیکھا۔”

ان کا کہنا تھا کہ زلزلے سے متاثرہ کئی خاندان وہی افغان مہاجرین ہیں جو حالیہ برسوں میں ایران اور پاکستان سے وطن واپس آئے ہیں اور یہاں نئے سرے سے زندگی شروع کر رہے تھے۔

عالمی برادری کی مذمت اور مدد

اقوام متحدہ کے سیکریٹری جنرل انتونیو گوتریس نے واقعے پر افسوس کا اظہار کرتے ہوئے کہا، انہوں نے کہا کہ میں افغان عوام کے ساتھ مکمل یکجہتی کا اظہار کرتا ہوں۔

یورپی یونین نے سابق ٹوئٹر ایسک پر بیان میں کہا کہ ہم افغانستان کے کنڑ اور ننگرہار میں زلزلے سے متاثرہ افراد کے ساتھ دلی ہمدردی کا اظہار کرتے ہیں۔ ہمارے انسانی ہمدردی کے شراکت دار متاثرہ افراد کو مدد فراہم کر رہے ہیں۔

وزیراعظم شہباز شریف نے کہا کہ کابل سمیت پاکستان کے کئی حصوں میں زلزلے کے جھٹکے محسوس کیے گئے۔ سینکڑوں جانیں ضائع ہو گئیں اور دیہات تباہ ہوئے، ہماری دعائیں متاثرین اور ان کے اہل خانہ کے ساتھ ہیں۔ پاکستان ہر ممکن مدد کے لیے تیار ہے۔

صدر آصف علی زرداری نے بھی دکھ کا اظہار کرتے ہوئے متاثرہ خاندانوں کے لیے دعا کی اور کہا کہ پاکستان افغان عوام کے ساتھ مکمل یکجہتی میں کھڑا ہے۔

افغانستان اور زلزلوں کی تاریخ

افغانستان میں زلزلے عام ہیں، خاص طور پر ہندوکش کے پہاڑی سلسلے میں، جو یوریشیائی اور بھارتی ٹیکٹونک پلیٹوں کے سنگم پر واقع ہے۔اکتوبر 2023 میں مغربی صوبہ ہرات میں 6.3 شدت کے زلزلے سے 1,500 سے زائد افراد جاں بحق اور 63,000 مکانات تباہ یا متاثر ہوئے تھے۔

جون 2022 میں پکتیکا صوبے میں 5.9 شدت کے زلزلے نے 1,000 سے زائد افراد کی جان لے لی تھی اور ہزاروں افراد بے گھر ہو گئے تھے۔

گزشتہ چار دہائیوں کی جنگ سے تباہ حال افغانستان پہلے ہی شدید انسانی بحرانوں کا شکار ہے۔ طالبان کے اقتدار میں آنے کے بعد غیر ملکی امداد میں کمی آ گئی ہے، جس سے آفات سے نمٹنے کی صلاحیت مزید کمزور ہو گئی ہے۔