لیڈز: پاکستان کرکٹ ٹیم کو انگلینڈ کے خلاف پہلے ٹیسٹ سے قبل بڑا دھچکا لگا ہے، کپتان بابر اعظم انجری کے باعث میچ سے باہر ہوگئے ہیں، جبکہ ان کی غیر موجودگی میں سلمان آغا ٹیم کی قیادت کریں گے۔
پاکستان ریڈ بال ٹیم کے ہیڈ کوچ سرفراز احمد نے لیڈز میں پریس کانفرنس کرتے ہوئے تصدیق کی کہ بابر اعظم پہلے ٹیسٹ کے لیے دستیاب نہیں ہوں گے۔ ان کے مطابق میڈیکل ٹیم بابر اعظم کی انجری کا جائزہ لے رہی ہے اور امید ہے کہ وہ دوسرے ٹیسٹ تک مکمل فٹ ہو جائیں گے۔
سرفراز احمد کا کہنا تھا کہ پاکستان نے پریکٹس میچ میں کامیابی حاصل کی، جس سے ٹیم کا اعتماد بڑھا ہے اور کھلاڑی انگلینڈ کے خلاف اچھی کارکردگی دکھانے کے لیے پُرعزم ہیں۔
ہیڈ کوچ کے مطابق پہلے ٹیسٹ کے لیے پلیئنگ الیون اور ٹیم کمبینیشن کا فیصلہ حالات کو دیکھتے ہوئے کیا جائے گا۔ انہوں نے محمد عباس کو انگلینڈ کی کنڈیشنز میں اہم بولر قرار دیتے ہوئے کہا کہ شان مسعود پہلے ٹیسٹ کے لیے مکمل طور پر فٹ ہیں۔
انہوں نے کہا کہ بابر اعظم کی عدم موجودگی ٹیم کے لیے یقیناً بڑا نقصان ہے، تاہم تمام کھلاڑی پُراعتماد ہیں۔ بابر فارم میں تھے اور ان کی موجودگی میں ٹیم مختلف کمبینیشن آزما سکتی تھی۔
سرفراز احمد نے سعود شکیل سمیت دیگر بیٹرز کی کارکردگی پر اعتماد کا اظہار کرتے ہوئے امید ظاہر کی کہ مڈل آرڈر انگلینڈ کے خلاف اہم کردار ادا کرے گا۔
